نصائحي لطلبة البكالوريا

حبيت فقط نقدملكم شوية نصائحي .بحكم اني عندي تجربة ناجحة ولله الحمد.
طبعا مابقاش بزاف على الباك ,ايام قلائل,واكيد راكم تحضرو من بداية العام(هدا لي حاب يجيبو بتقدير:wink
*نصيحتي ليكم حاولو تستغلو الوقت في المراجعة الجدية ,لجميع المواد بدون استثناء ,لانو اهمال مادة قادر يأثر على المعدل .وخصوصا الطلبة لي يركزو على المواد العلمية ويهملو المواد الادبية,نقولهم راكم غالطين,صح ركزو على المواد العلمية لكن حتى المواد الاخرى اعطيولها حقها باش تعوضو بيها.غير الفلسفة حاولو معاها ولي تجيبوه مليح:heh:ههههه.
*حاولو تركزو على جميع الدروس ,لانو الامتحان رايح يكون شامل ,واهمال دروس ماهوش في صالحكم,ممكن الدروس لي تحفظوهم يجيبو عليهم اسئلة صعبة والدروس لي ماتحفظهومش تكون سهلة جدا.
*تجنبو الفوضى وقلة النظام وتضييع الوقت,كل واحد يخصص وقت يناسبو يراجع فيه مع تجنب السهر المطول والليالي البيضاء,صدقوني رايح يرجع سلبا على صحتكم وماتستفادو والو,احسن وقت هو وقت الفجر.طبعا مع اخذ قسط من الراحة بين مراجعة كل مادة ومادة.وتجنب مراجعة مادتين متتاليتين متشابهتين,يعني مثلا بين الرياضيات والفيزياء راجعو اللغة الانجليزية ولا ادب عربي.
*النصيحة الاهم هي تجنب القلق والتوتر والخوف,لانها ترجع سلبا عليكم,لما الخوف؟؟الباك ماهو الا امتحان كباقي الامتحانات,صدقوني بمجرد قراءتكم للاسئلة تحسو براحة وتقولو هدا ماكان؟هههههههه.
*تجنبو السهر المطول الليلة التي تسبق الامتحان,اكتفيو بمراجعة خفيفة وتصفح فقط.
*لا تنسو الذكر والدعاء,وتوكلو على الله .وقبل استلام مواضيع الامتحان لا تفكرو في شيئ .اقراو سور من القران وخصوصا المعوذات وأيات الكرسي..
*عند الخروج من الامتحان لا داعي لمناقشة اجوبتكم مع زملائكم,هدا مايفقدكم تركيزكم .انسو الامتحان وفكرو في الامتحان الموالي.
*والاهم ايضا تنظيم ورقة الاجابة والكتابة بخط واضح.حتى لا يمل المصحح من ورقة اجابتك ويضيع حقك في التنقيط.
هدا مايحضرني الآن من نصائح
لي عندو اي استفسار ولا يحتاج نصيحة اخرى مايترددش ,مستعدة نجاوبكم
ربي يوفقكم وينجحكم بتقدير ان شاء الله