طريقتــــــــــــــي السحرية في حفظ التواريخ وداعا لعقدة التواريخ...؟

شوفوا نمدلكم طريقة لحفظ التواريخ بسهولة مي ماتضحكوش عليـــا ،انا مهبولة شوية وعندي تخمام مهبول كيما انا مي والله وراني نحلفلكم غير التواريخ حفضت اغلبيتهم وكل مانحفظ تاريخ ما جامي راحلي من بالي .
والطريقــة هي : كل تــــاريخ ديرولو حكاية معينـة وضرك نمدلكم مثال
زعمــا 19 جــــــوان 1965 :الاطــاحة بنظام احمد بن بله ( التصحيح الثوري)

شوفو زعما انـا عمري 19 وختي زايدة في جاون وعمتي عمرها 65 سنة ، زعما نقول انا وختي طيحنا عمتي ههههههههه والله غير بقاتلي مرسخة في بالي.
ومثلا 22 اكتـــوبر 1956 : القرصنة الجوية ( اختطاف طائرة الوفد الجزائري ال5 )
خويا عمرو 22 سن وبنت خالي زايدة في اكتوبر وباباها زايد في 1956
نقول مثلا خويا وبنت خاتي وباباها راحو يحوسو في طائرة .

مثال آخر ياسيدي : 23-10-1958 : سلــــــم الشجعان



ختي عمرها 23 وبنت خالتي زايدة في اكتوبر وبابا عمرو 58 سنة نقول اختي وبنت خالتي وبابا شجعان يا محاينك.

مثال أخيـــر باش مانصمطش عليكم
04-10-1958 :مشــــــروع قسنطينة
انا زايدة في يوم 4 وبنت خالتي اكتوبر وبابا عمرو 58 سنة معنتها انا وبنت خالتي وبابا رحنا نحوسو في قسنطينة
ههههههههههههه ماتضحكوش بزااااااااااف مي والله والله هاذي الطريقة الامثل وراهي عاجبتني بزااااااااااف وكل مانشوف تاريخ ما نربطو بلحكاية ونسترجعو وصباح لعبنا لعبة التواريخ انا وصحاباتي والاغلبية انا لقيتهم والله قولو ماشاء الله